The Land O' the Leal
Carolina Nairne · 1790
Public domain
From The Golden Treasury, selected by Francis Turner Palgrave. Carolina Nairne. The text is free of copyright in the United States. This copy is the poem, without the Project Gutenberg header.
I'm wearing awa', Jean
Like snaw when its thaw, Jean,
I'm wearing awa'
To the land o' the leal.
There's nae sorrow there, Jean,
There's neither cauld nor care, Jean,
The day is aye fair
In the land o' the leal.
Ye were aye leal and true, Jean,
Your task's ended noo, Jean,
And I'll welcome you
To the land o' the leal.
Our bonnie bairn's there, Jean,
She was baith guid and fair, Jean;
O we grudged her right sair
To the land o' the leal!
Then dry that tearfu' e'e, Jean,
My soul langs to be free, Jean,
And angels wait on me
To the land o' the leal.
Now fare ye weel, my ain Jean
This warld's care is vain, Jean;
We'll meet and aye be fain
In the land o' the leal.